يسوؤنى أحيانا أن يغفل البعض مزايا مهمة ومميزة للأم المصرية.. آه عملنالها عيد.. وآه بنكع دم قلبنا عشان هدية هذا العيد.. وآه عملنا مسلسلات وأفلام وبنسح عياط كل ما بنسمع «ست الحبايب يا حبيبة» فى أى حتة.. لكن هل ندرك فعلا مدى تأثير تربية أمهاتنا لنا والبصمة التى يتركونها على شخصياتنا وسلوكنا فى الحياة عموما؟..

سيبك من الأكل والشرب وسهر الليالى جنبك وانت عيان والصلوات والدعوات بأن يجعل الله لك فى كل سكة سلامة وفى كل خطوة جنيه.. ده شىء مفروغ منه وانت عارفه كويس.. لكن بص على المزايا الأخرى.. التصرفات البسيطة اللى فى الغالب بتشكل شخصيتك.. الأم المصرية مثلا قد تشجعك على الإيمان والتمسك بحقك فى حرية التعبير من خلال تشجيعك على إبداء رأيك الحقيقى فى الآخرين عن طريق جملة لطيفة مثل (تف على عمو يا «ميدو»)..

قد تشجعك على التعود على مواجهة مخاوفك الدفينة ومقاومتها وعدم الهرب منها بتصرف عظيم زى إنها تاخدك السينما مع إنها عارفة إن كل العيال بتتسرع فى الضلمة لكن لأ.. إجمد وخليك راجل.. والناس اللى فى السينما.. سيبك منهم.. يخبطوا راسهم فى الحيط..

ونظرية يخبطوا راسهم فى الحيط دى مهمة جدا لرسم ملامح شخصيتك فى المستقبل وبتبتدى أمك ترسم ملامحها بإنها بتاخدك عند طنط «فوفة» وتسيبك تتنطط على الكنب وتكسر فى الفازات وتلتفت للست الشايطة من تصرفاتك بضحكة رايقة وتقول لها «هيهيهيهى.. معلش بأه عيل وبيلعب» وهو تصرف بالتأكيد ستتعلم منه أن تكون شخصية جلدها تخين.. وطالما انت مبسوط يتحرقوا الآخرين وده أوبشان هايل هتستمتع بيه بعد كده يوم فرحك وانت بتركب ميكروفون بيذيع أغانى مصطفى كامل 24 ساعة فى بلكونة جارك اللى ولا بيفرق معاك إنه بسببك ممكن يجيله انهيار عصبى أو إن مراته ناوية ترمى نفسها قدام أتوبيس نقل عام..

التضامن الاجتماعى والعدل والمساواة بتتعلمه منها لما أخوك الكبير يغلط فإنت كمان تنضرب.. أختك الصغيرة تغلط.. إنت برضه هتنضرب وهو ما يرسخ فى ذهنك الشعار الوطنى المصرى.. يا نعيش عيشة فل يا نموت إحنا الكل، بعض الأمهات بيغرزوا فى أولادهم صفات تخليهم يدخلوا أى قسم شرطة وهم مش خايفين.. ماهى لسعتك زمان بالشوكة وضربتك بالشبشب وربطتك فى رجل السرير وحبستك فى عشة الفراخ هيجرى لك إيه تانى؟..

بتشوفها بتخنصر من مصروف البيت وبتشترى دهب فبتتعلم الاقتصاد.. بتشوفها بتنم مع الجيران على الجارة الجديدة فبتتعلم أهمية تبادل المعلومات.. ولو الدنيا ضاقت بيها وقررت تقطع أبوك بالساطور بتشوفها بتحطه فى أكياس وتربطه بإحكام.. شوف الحنية..الست خايفة عليه من الرطوبة.. فبتتعلم أهمية الاعتناء بشريك الحياة.

أمك دى ست عظيمة ومليانة مميزات.. واضحة.. وخفية.. تعجبك أو ما تعجبكش المميزات وهتأثر فيك بالسلب ولاّ بالإيجاب؟.. شغل إنت مخك بأه.. لكن بالتأكيد أمهاتنا فوق رؤوسنا وإحنا كل أمانينا إننا نكون تحت رجليهم.