أول ما ترجع من الخارج، من أى زيارة قصيرة كانت أوطويلة، أول حاجة بيقولوهالك كل اللى حواليك بتكون: «حمدا لله ع السلامة»، يتبعها على طول قولهم باستنكار: «إيه اللى طخك فى دماغك ورجعك؟.. حد يسيب هناك ويرجع هنا؟» بتسمعها من كل اللى بتقابله وآجلا أو عاجلا بتأثر فيك وبتبتدى تقعد مع نفسك وتفكر بهلع: هو أنا عملت فى نفسى إيه؟ أنا إيه اللى رجعنى بصحيح؟، ولولا إن أنت متربى فى حضن أصوات مصرية عذبة حفظتك: مصريتنا وطنيتنا حماها الله.

وكنت كل ما تسمع عايدة الأيوبى بتقول «لا يا مصرى لا، تهجر بلدك وتسيبنا بلدك بيك أولى» تتفتح فى العياط وكل ما بتسمع نادية مصطفى بتأكد «إن لقيت فى الغربة المال فين هتلقى راحة البال» تصرخ بعلو صوتك: عظمة على عظمة يا ست، كنت صدقتهم وقضيت أيامك ولياليك تلوم نفسك على المصيبة اللى عملتها ودمرت بيها مستقبلك.

هو انت صحيح من صغرك ماكنتش فاهم إيه اللى كان مزعل عايدة من الناس اللى بتتغرب عشان تشوف أكل عيشها مادام مش لاقيينه هنا ولا إيه اللى كانت تقصده نادية بما إن كل اللى حواليك لا بالهم مرتاح ولا يحزنون، لكن كنت مصدق ومآمن لحد ماسافرت ورجعت وكل اللى حواليك قالولك يا ريتك ما رجعت. فيه ناس بيقولولك كده بس عشان الجانب المادى، حالة البلد الاقتصادية ونسب البطالة والتضخم وكل الكلام اللى كنا بنسمعه وإحنا صغيرين فى نشرة الأخبار هو غالبا السبب الرئيسى لطوابير الانتظار قدام معظم السفارات الأجنبية ولرواج رحلات قوارب الموت المنطلقة للآخرة مرورا بإيطاليا، لكن برضه أسباب محاولات السفر والهجرة مش بس مادية، فيه ناس دوافعهم بتكون مجرد رغبة فى الإحساس بآدميتهم، بيحكولك إزاى بره مافيش زبالة فى الشارع، الكل بيلتزم بقواعد المرور، الكل بيقف فى الطابور، الكل بياخد حقه وبيحاول ما يجنيش على حق غيره، ما فيش تحرش بأنثى لمجرد إنها أنثى، ماحدش بيرص قاموس شتايم نابية لأى حد لمجرد إنه داس على ضله فى الشارع. الناس اللى بيسافروا أو بيهاجروا للأسباب دى هم أحفاد رفاعة الطهطاوى وبيرم التونسى اللى سافروا واتخضوا من الفرق بين هنا وهناك وكان نفسهم ومنى عينهم ينقلوا اللى هناك هنا لكن لأنهم عارفين إن ده شبه مستحيل فضلوا يتنقلوا هم هناك ويسيبوا هنا.


طبعا فيه استثناءات وأكيد هناك مش جنة ربنا على الأرض، لكن لازم نعترف إن فيه عندنا مشكلة، بننافق ونرتشى ونتكاسل ونتواكل ونكدب ونغتاب ومؤمنين إننا من شعوب الله المختارة، بنتحايل على كل قاعدة وكل قانون، عايزين ناخد حقنا وحق غيرنا، بنعتبر أكوام الزبالة حوالين بيوتنا «نايس فيو» ولسه بنسمى نفسنا بلد الحضارة، لا يمكن حد مننا يمشى فى شارع إلا ويواجه ألفاظا بذيئة وتحرشات وفظاظة فى التعامل وتلاكيك بتقدم لخناقات مع إننا كلنا لسه حافظين وبنردد: «تبسمك فى وجه أخيك صدقة»! مش محاولة لجلد الذات ولا دعوة للهجرة لكن لازم نعترف إن فيه مشكلة ومظاهر سلبية واضحة تغلغلت فى الشارع المصرى ومش ضرورى يكون سبب وجودها هو بس الفقر أو الفساد، المشكلة موجودة من زمان وتجاهلنا ليها هو اللى بيخليها تتفاقم، موجودة من أيام رفاعة ما رجع من أوروبا يقول «وجدت إسلاما بلا مسلمين»، من أيام ما بيرم التونسى كتب «دى بلاد تمدين ولطافة وذوق ونضافة وحاجة تغيظ».

سمعنا كلامهم وابتسمنا واستمرينا زى ما احنا نرمى كيس الزبالة جنب العمود ونعمل خناقة لرب السما مع الجيران عشان مش عاجبنا اعتراضهم على غسيلنا اللى بينقط على غسيلهم ونزق وندوس ع الناس فى أفراح الأوبن بوفيه عشان نلحق حتة لحمة وشوية جمبرى وننزل فى المترو من باب الطلوع ونطلع من باب النزول ونبص لأى بنت فى الشارع من فوقها لتحتها بصة تحرمها تنزل الشارع تانى. المشكلة موجودة وفى طريقنا كل يوم، لكن لازم نبطل نتعامى عنها عشان نحاول نحلها وإلا فعلينا السلام، أحمد شوقى زمان قال «إنما الأمم الأخلاق ما بقيت فإن همو ذهبت أخلاقهم ذهبوا» وبيرم بيقول فى آخر قصيدته «دول ناس كنا أحسن منهم قول ومسيرنا بإذن الله، نبقى أحسن منهم برضك بعد الدرس اللى أخدناه، والله ده عيب نتهجى دروس يا أساتذة على التلاميذ».. وأدينا لسه بنتهجى، يا ترى فيه أمل نفهم الدرس؟