المذيعة: مساء الخير عزيزي المواطن.. تحب حضرتك تشترك معانا في البرنامج
● المواطن: على حسب الإشتراك بكام؟
- آه ده شكله عسل وهيتعبنا.. يافندم أنا قصدي تشترك معانا برأيك؟
● والله يافندم أنا لو كان عندي رأي أحب أحتفظ بيه لنفسي.
- حضرتك مكبر الموضوع ليه.. ده برنامج إذاعي بنحتفل فيه بذكرى الثورة
● يافرج الله.. هي الثورة قامت أخيرا؟.. والله ماحد قال لي
- لاحول الله يارب.. عزيزي المواطن إحنا بنتكلم عن ثورة يوليو بتاعة الزعيم جمال عبد الناصر
● أيوه عارفه.. جمال عبد الناصر مبارك.. شاب أمير وربنا هينصره علينا إنشاء الله
- لا مش هينفع كده خالص.. شوفوا لنا مواطن تاني والنبي.. عشان اليوم المجيد ده يعدي
المعد: باقولك إيه ياهانم.. ده المواطن المتاح دلوقتي.. مشي حالك بيه لحد مانلاقي غيره
● يافندم حضرتك متعصبة ليه.. أنا باهزر معاكي.. حد مايعرفش ثورة يوليو.. مش دي اللي ثورة أطلقها جمال.. وإحنا حفرنا القنال وبعدين حررناه وبنفكر نبيعه دلوقتي.. أنا راكب معاكي في البرنامج.. اتفضلي
- الصبر من عندك يارب.. حضرتك ممكن نبتدي نسجل بس أستسمحك الإجابة تبقى على قد السؤال
● والنبي البرنامج ده هيبقى عسل.. إنتي بس شوطي وربنا هيكرمنا
- المذيعة: أعزائي المشاهدين كل عام وأنتم بخير.. في هذا اليوم المجيد نزلنا إلى شارع الثورة لننقل فرحة المواطنين بهذا اليوم التاريخي الذي غير وجه مصر.. التقينا بأحد المواطنين وسألناه عن رأيه في مبادئ ثورة يوليو؟
● هي ثورة يوليو عندها مبادئ. والله ماكنت أعرف.
- أيوه يافندم ثورة يوليو عندها ست مبادئ
● ياعيني.. ده الواحد مننا بيبقى عنده مبدأ بيطلع عينه في الزمن ده وهي عندها ستة.. الله يكون في عونها.
- إيه اللي حصل للناس بس يارب. ياسيد يامحترم مبادئ يعني أهداف
● والله.. يعني الثورة عندها ست أهداف زي الأهلي كده.. وجابتهم في مين؟
- ماهو ده السؤال يافندم؟ في رأيك كإبن من أبناء مصر بعد مرور 58 عاما على الثورة ماالذي تحقق من أهداف ثورة يوليو؟
● إنتي مش بتقولي إنها جابت ست أهداف خلاص.
- يابني آدم إفهم الثورات غير الماتشات.. الثورة بتيجي بأهداف وبعد كده بتحققها. فهمت؟
● أيوه فهمت.. يعني في الماتش بنلعب عشان نحط الهدف.. في الثورة بنحط الهدف وبعد كده بنلعب فيه.. والنبي ماتتنرفزي ياست هانم.. أصل أنا والله أول مرة أسمع حكاية أهداف الثورة دي.. حضرتك قولي لي الهدف وأنا أعلق لك عليه بعون الله
- معقول برضه.. بص ياسيدي أول هدف من أهداف الثورة القضاء على الإستعمار وأعوانه، إيه رأي حضرتك في هذا الهدف؟
● ارجوكي أعذريني أنا ماأحبش أجيب سيرة الإستعمار
ليه إنشاء الله؟
- عشان أعوانه هيزعلوا.. وزعلهم أوحش من زعل الإستعمار ذات نفسه
- إنت غريب قوي على فكرة.. بلاش الإستعمار.. عندك مثلا من أهم أهداف الثورة كان القضاء على الإحتكار وسيطرة رأس المال على الحكم
● من فضلك أنا وافقت أسجل على أساس إن ده برنامج تاريخي.. ومش هتجيبوا سيرة أحمد باشا عز وحديد عز .. أنا عندي عيال وعايز أعالجهم
- إيه علاقة أحمد باشا عز وحديده بالموضوع ياأخينا
● مش بتقولي إحتكار.. عايزه تخليني أقول الكلام اللي بيقولوه عليه بتوع المعارضة إنه محتكر الحديد عشان هو صاحب جمال مبارك وأمين تنظيم الحزب الوطني.. بصي بقى أنا شاكك فيكو بصراحة.. إنتو من قناة إيه.. معاكو كارنيهات
- ييه ده هيقلب دماغنا.. بلاش ياسيدي الهدف ده.. خلينا في هدف غيره.. عندك مثلا هدف القضاء على الإقطاع
● حضرتك بتتكلمي عن الثورة الفرنساوية ولا ثورة يوليو.. ممكن توريني كده الورقة اللي بتقري منها
- من فضلك ممكن تعلق على الهدف وإنت ساكت
● إزاي يعني.. أعلق وأنا ساكت إزاي؟
- قصدي تتكلم في صلب الموضوع
● ماهو معلهش ياست هانم.. إنتي عماله تقولي لي قضاء على الإقطاع وتحقيق العدالة الإجتماعية بين طبقات الشعب.. إنتي مش عايشه معانا في البلد.. أنا حاسس إنك بتتبلي على ثورة يوليو وبتلزّقي لها أهداف من وراها.. أصل يعني لو ثورة يوليو كانت بتهدف للكلام ده ماكانتش هتقعد 55 سنة من غير ماتحققه.
- طب خلاص خلاص أنا هاختار لك هدف تاني وقول تعليقك بأدب لو سمحت.. وبلاش ألفاظ تلزّقي وتتبلِّي والكلام ده.. تهدف ثورة يوليو إلى إقامة حياة دستورية وديمقراطية سليمة.. حضرتك بتضحك ليه؟
● أصلي افتكرت إنها سليمة سليمة.. فاكره لما الكافر في فيلم فجر الإسلام قال شلت يدي وبعدين ضحك عليهم وقال إنها سليمة سليمة.. آه ياكفرة.. إنها سليمة قال
- طيب نكتفي بهذا القدر مع المواطن الكريم لكي نتيح الفرصة لعشرات المواطنين الذين يتسابقون خلف الكاميرا على إبداء رأيهم في أهداف ثورة يوليو. كفاية كده أنا مش مكملة مع الراجل ده.. أبقى ست مش كويسة ويارب أتنقل القناة التامنة لو كملت معاه
● المعد: طيب خلاص هدي نفسكي ياهانم.. هنمشيه.. بس إنتي إهدي والنبي
- إيه ده.. مش ممكن.. ده لسه واقف هنا.. إنت ياأخينا ماتتوكل على الله وتمشي من هنا.. ماخلصنا التسجيل.. إنت واقف هنا ليه؟
● مستني إعادة «الأهداف».
- (حوارية نشرت لأول مرة عام 2007 من كتابي السكان «الأصليين» لمصر.. قبل أن أشارك بنفسي في ثورة لا زالت تحتاج هي الأخرى إلى إعادة الأهداف).